Ku muhinga wo kuruyu wa gatandatu igenekerezo rya 24 Rusama 2025, bamwe mu Barundi baba mu Bwongereza barahimbaje ‘Burundi Cultural Day’ ku ncuro y’icenda, umunsi bahariye guhimbaza no kwigina akaranga n’imico kama vy’Abarundi mu Bwongereza.
Ivyo birori vyabereye mu gisagara ca Coventry kiri mu karere ka ‘West Midlands’ ko hagati na hagati mu Bwongereza, ivyo birori bikaba vyateguwe n’Abarundi baba iCoventry bahurikiye mw’ishirahamwe ry’Abarundi ryitwa CBC (Coventry Burundian Community).
Bikaba vyaranzwemwo akamwemwe kenshi, kwiginana no gusangira imfungurwa,
abari bavyitabiriye berekanye ingene bari bakumbuye akaranga k’igihugu c’amavukiro mu gutamba indirimbo zo mu mirwi n’izo mu kivunga.
Imirwi y’abatamvyi y’abana bafise imyaka iri hagati ya 6 na 10, abafise iyirenga 10, abafise iyiri hejuru y’imyaka 15, n’iyo abavyeyi babo, baratamvye batarika muri ivyo birori, ivyatumye bamwe mu banyamahanga bahaguruka bagatambana na bo.
Kurikira iki kiganiro https://youtu.be/5QVHAJJaC9w?si=Or8YAPMLG_wAeVzC
